Svala Hannesdóttir var fædd árið 1928, hún var mikil áhugamanneskja um leikhús og leik og skráði sig í Leikskóla Ævars Kvaran í kringum 1950. Í náminu samdi hún leikþáttinn Ágirnd fyrir leiksvið en þetta var látbragðsleikur án tals þar sem farið var í hinn mannlega harmleik sem græðgi og ásælni í auðfengið fé er. Hinn mikli kvikmyndafrumkvöðull, Óskar Gíslason, sá leikþáttinn og vildi setja hann í kvikmyndabúning. Í samstarfi við Óskar og aðstoðarmann hans, Þorleif Þorleifsson, setti Svala Ágirnd í kvikmyndabúning. Myndin varð alræmd eftir að hún kom út og var farið hamförum í blöðunum gegn henni og því guðlasti og gjálífi sem hún boðaði sem endaði með lögregluskoðun á myndinni. Svala er titlaður leikstjóri Ágirndar og er með því fyrsta konan til að leikstýra leikinni mynd á Íslandi. Eftir útkomu myndarinnar og viðbrögðin sem hún fékk hætti Svala að leika og þegar hún lést árið 1993 voru engar minningargreinar skrifaðar um hana.

​

Kvikmyndasafn Íslands –

National Film Archive of Iceland  https://kvikmyndasafn.is/